ياحسافه كيف بي بندر فعلها

[السنعوسي]

افا يابندر هالحين اجي ضيف عليك وتوديني لجارك والله انك ماسبقت عليه 0 عمري مادخلت صفحه غير صفحات الشعر الشعبي وجاي اركض يمك وعلى طول تزلعن يم التعارف افا والله يابعدي لو ابي التعارف ماجيت يمك ويم منتدى الشعر الشعبي 0 ماهي مشكله يابعدي كان ماتبيني انت غض النظر كأنك ماشفتن واصبر شوي يمكن فيه غيرك يبيني هنا


ياحسافه كيف بي بندر فعلها


000000000000000 جيت له ضيفٍ وشالن يم جاره

جيت يمه اقطع العسر وسهلها

000000000000000 شفقٍ لشوفه ولي رغبه بداره

معتجل في خطوتي ماارغب مهلها

000000000000000 ولاشكيت البرد وطقوس الحراره

جيت ابي جلسة شبابه مع كهلها

000000000000000 وهو قلعني يم من سادة أمهاره

المراجل ماهقيت انه جهلها

000000000000000 لكن انه جت سهو ماهي حضاره

والقصيده جاويت منهو سألها

000000000000000 قبلكم منهو نقل ضيفه لجاره

تسلم يابندر والله لايهينك يابعدي واعذرني على هذا التطفل

دمت بخير وتقبل الف تحية وتحية من اخيك

السنعوســـــــــــي

[حمود الصهيبي]

دائما ماتمتعنا بفن اسلوبك وروعة حروفك
دائما ماتلفت انتباهنا وتسلب قلوبنا وتسرق اعجابنا وتقديرنا

صح لساانك

[بندر السميري]

اخوي /السنعوسي


يسعد مساك

لم اتوقع ان يصل الامر الى هذه الدرجه ولكن احب ان اوضح لك نقطه وهي ان مواضيع الترحيب او السلام على الاعضاء مكانه المخصص له هو المنتدى العام وقسم الشعر مخصص للشعر فقط ..


اما بالنسبة لقصيدتك لم اتمنى ان تكون هي اول قصيده لك في المنتدى




والله ان الطيّبه مارضى بدلها

.................................. قد بنيت بفعلي الطيّب عماره

المراجل كلها عزمي وصلها

.................................. وجيت يم العز ثم شبيت ناره

واجب الضيفان قلبي ماهملها

................................... والمعزّب( دوم ضيفه في قراره)

اعرف العله واعرف اللي عملها

.................................... صاحبك دكتور في فن الصقاره

لاتدس السم في صافي عسلها

.................................... قبل تبدا صف علمك من غباره

انت جيت الدار قبلك من نزلها

..................................... خل سيرك يالسنافي في مساره

يشملك مثل النشامى ماشملها

..................................... كل رجلٍ له مقامه واعتباره





واعذرني على هذا الرد الكيبوردي من اخوك الصغير

ولا أحمل لك الاّ كل الود



تحياتي ........

[بنت القبايل]

الاخ والشاعر000 السنعوسى


كما عهدتك رائعا لا تتكلف الشعر

مصافحه جدا جميله وانيقه




___________________________

ملاحظه


بندر صح لسانك والله


اتمنى ان ارى مزيدا من ابداعكم



تقبلوا تحياتى واحترامى


اختكم بنت القبايل

[السنعوسي]

والله ان الطيّبه مارضى بدلها

.................................. قد بنيت بفعلي الطيّب عماره

المراجل كلها عزمي وصلها

.................................. وجيت يم العز ثم شبيت ناره

واجب الضيفان قلبي ماهملها

................................... والمعزّب( دوم ضيفه في قراره)

اعرف العله واعرف اللي عملها

.................................... صاحبك دكتور في فن الصقاره

============================

كفو كفو يابندر وصح لسانك

قده وقدود الله لايهينك

شكرا لك على رحابة صدرك واتمنى فعلا انه مايكون بالخواطر شين ولاتعتب علي يابعدي ترى من طبعي احب المداعبه وخصوصا بالشعر واتمنى اني ماجرحت مشاعرك والي تامر به تحت سبال يديك بس لايشين الخاطر يالعزوه

انا عن موضوع منتدى التعارف 0 عاد اغسل يدك اني بروح هناك ترى والله مااعرف الا منتديات الشعر لذلك تحملوني

اكرر شكري وعرفاني على سمو اخلاك

دمت بخير وتقبل الف تحية وتحية من اخيك

السنعوســــــــــــي

[بندر السميري]

السنعوسي



ماعليك زود يالغالي والله لايهينك


ويعلم الله ان مافي خاطري الاّ كل خير ولا احمل الاّ الحب للجميع

وصدقني اني كتبت القصيدة من باب المداعبه لا أكثر

وبالنسبة للمنتديات

انت خذ جولة في اقسام المنتدى واطّلع عليها وصدقني راح تجد الفائده

والمنتدى منتداك (( خذ راحتك يعني))


تحياتي.....

[محمد السعدون]

السنعوسي

دائما ماتمتعنا بفن اسلوبك وروعة حروفك


دائما ماتلفت انتباهنا وتسلب قلوبنا وتسرق اعجابنا وتقديرنا

صح لساانك

وصح لسانك يا بندر

تقبل تحياتي

محمد السعدون